Hiki Ndicho Kitakachotokea Katika Kivukio Cha Mtongwe Kuanzia Ijumaa Hii

Shirika la huduma za ferry limetangaza ya kwamba kivukio cha Mtongwe kitaanza kutumika tena kuanzia siku ya Ijumaa , Februari 24.

Kuanza kutumika tena kwa kivukio hicho cha Mtongwe kutaleta afueni kwa zaidi ya abiria 30,000 kila siku. Kivukio cha Mtongwe kitaanza tena huduma zake baada ya  kufanyiwa ukarabati uliogharimu shilingi milioni 6 baada ya serikali kuondoa ferry mbili zilizokua zikihudumu katika kivukio hicho mnamo 2012.

Msimamizi mkuu kwa huduma za ferry, Bakari Gowa ameeleza ya kwamba  moja kati ya ferry tano zinazotumika katika kivukio cha Likoni itatumika katika kivukio hicho cha Mtongwe. ‘Moja kati ya MV LIKONI na MV KWALE itakua inahudumu katika kivukio cha Mtongwe. Kwa kuanzia, huduma za ferry Mtongwe zitakua wakati wa msongamano, alafu ratiba ya huduma itabadilika kulingana na jinsi huduma hizo zitakavyopokelewa na huenda zikaanza kufanya kazi siku nzima.’  Bwana Gowa ameeleza  huku akiendelea na kusema ya kwamba anaamini ya kwamba kurudi kwa huduma hizo kutakua kwa manufaa kwa wakaazi  wa Mtongwe na watumizi wa kivukio hicho  ikiwa ni moja wapo ya mikakati ya kupunguza msongamano katika kivukio cha Likoni.

Itakumbukwa ya kwamba April, 29 mwaka wa 1994, takriban abiria 272 walipoteza maisha yao baada ya ferry kuzama katika kivukio hicho, tukio ambalo linaorodheshwa kua ajali kubwa ya baharini nchini Kenya. Kufikia mwaka wa 2005, takriban familia 81 zilikua zimepokea fidia ya jumla ya Kshs 36,902,472.